Aygün Səmədzadə: ”Mahnılarımın qiymətini ödəyə bilən müğənni yoxdur"

Bəstəkar heç bir müğənniyə mahnı bağışlamadığını deyir

"Mən heç bir müğənniyə mahnılarımı bağışlamıram. Sadəcə olaraq onlara müəyyən müddət mahnılarımı ifa etmək hüququ verirəm. Mahnı əşya deyil ki, kimə isə verim. Bəstəkarın ölümündən sonra da mahnıların hüquqları onların ailələrinə verilir". Bunu ANS PRESS-ə müsahibəsində bəstəkar Aygün Səmədzadə bildirib.
Bəstəkar dünya şou-biznes təcrübəsində müğənnilərin bəstəkarlara yüksək məbləğ ödəyərək mahnının hüququnu əldə etmələrinə belə münasibət bildirdi: ”İnanmıram ki, Azərbaycanda elə bir müğənni tapılsın ki, mənim mahnılarımın qiymətini ödəyə bilsin".
Ən çox sevilən mahnıların müəllifi kimi tanınan Aygün Səmədzadə eyni zamanda kaprizli bəstəkar kimi də tanınır. Onun mahnılarını ilk ifaçıdan alıb digər müğənniyə verməsinin dəfələrlə şahidi olmuşuq. Bəstəkar bu məsələyə də aydınlıq gətirdi: "Fikir vermisinizsə, mən tez-tez müəllif konsertləri keçirirəm. Əgər hər hansı bir müğənni mənim yaradıcılıq gecəmdə iştirak etmirsə, avtomatik olaraq onda olan mahnımı başqa ifaçıya verirəm. Mənin qərarımdan heç kim döndərə bilməz. Necə ki, bu hal Aygün Kazımova və Nazpəri Dostəliyeva ilə baş verib. Bu o demək deyil ki, mənim o sənətçilərlə şəxsi problemim var. Sadəcə həmin müğənninin mənim sənətimə göstərən münasibətinə, onu yeni müğənni ilə əvəz etməklə münasibət bildirirəm.

O ki, qaldı həmin müğənniyə mahnımı ifa etməyi qadağan edim, bu bizdə alınmır. Bizdə qadağa mədəniyyəti yoxdur. Bizdə qadağaya riayət etmək mədəniyyəti olmadığına görə artıq özümü yormaq istəmirəm. Oxumaq istəyirlərsə oxusunlar. Amma şəxsən mən özüm artıq həmin mahnını yeni ifada dinləməyə üstünlük verirəm".

Bəstəkar mahnının yalnız bir müğənniyə aid olması ilə heç vaxt razılaşa bilmədiyini deyir: "Çünki hər bir mahnı bir dəfə yaranır. Bu baxımdan da mahnını müxtəlif müğənnilər ifa edə bilər. Mahnının səs baxımından fərqli ifaya ehtiyacı olduğunu hesab edirəm. Ümumiyyətlə mən bu məsələləri müğənnilərlə müzakirə etmirəm. Çünki mahnılarımın tam hüquqları özümdədir.

Bir var mahnının hesabına tanınan müğənni, bir də var müğənninin hesabına tanınan mahnı. Mənim mahnılarımın müğənninin hesabına populyar olmasına ehtiyac yoxdur. Müğənnilər mənim mahnımla populyarlıq qazana bilərlər".