Röya: "Məsləhət verənləri söyürəm..."

"Başqalarının verəcəyi qərara müdaxilə etməyi xoşlamıram"

Röya boşanma ərəfəsində olan Zamiqə dəstək olduğunu bildirib. Müğənni ANS PRESS-ə açıqlamasında bu dəstəyin Zamiqlə işbirliyinin olduğunu deyib: "Birlikdə həyata keçirəcəyimiz "Doğma diyar" layihəmiz belə bir çətin dönəmdə ona çox kömək olur. Tez-tez zəng vurub deyirəm ki, "Zamiq filan iş belə oldu, filan işimiz uğurlu alındı və s.". İşlərimizin çoxluğu Zamiqə depressiyaya düşməyə, fikir çəkməyə imkan vermir. İnşallah, Zamiq bu çətin dönəmdən alnıaçıq çıxacaq".

Röya yaxın dostuna şəxsi həyatı ilə bağlı heç bir məsləhət vermədiyini də qeyd edib: "Mən nəinki Zamiqə, ümumiyyətlə heç kimə məsləhət verməyi xoşlamıram. Məsləhət verənləri də söyürəm. Barış və ya barışma. Mən deməklə deyil axı. Sonda həmin şəxs özü görəcək qarşısındakı insanın necə olduğunu. Bu baxımdan da Zamiqə nə boşan, nə də boşanma deyə bilmərəm. Qoy qərarı özü versin. Şəxsən mən həyatımda bütün qərarlarımı sərbəst verirəm və başqalarının verəcəyi qərara da müdaxilə etməyi xoşlamıram".

Röya internet saytlarının birində gedən müsahibəsinə də aydınlıq gətirməyi unutmayıb: "Guya mən demişəm ki, Nigar başqa yolun adamıdır. Anar deyir ki, "ay qız, nəyinə lazımdır, qadın xeylağıdır, niyə elə demisən?". Amma mən o müsahibədə demişəm ki, "hərənin öz yolu var, bəlkə onun yolu tamam başqadır, Zamiqinki başqa?" Axı mən necə deyə bilərəm ki, Nigar yaxşı qızdır, ya da pis? Mənim Nigarla heç şəxsi tanışlığım olmayıb. Onun haqqında bir söz deyə bilmərəm".

Maraqlıdır ki, Zamiqin boşanma məsələsi ilə "Doğma diyar" turnesi eyni ərəfəyə düşüb. Nigar Rəfiyeva məhz Röya ilə Zamiqin adıçəkilən layihənin hazırlıqları, daha doğrusu bölgələrdə reklam çarxının çəkilişləri zamanı boşanma qərarını verib. Bu nüans Nigarın Zamiqi Röyaya qısqandığını və ayrılıqlarının onun üzündən olduğu barədə söz-söhbətlərin yayılmasına səbəb olub. Röya müsahibəsində bu məsələyə də aydınlıq gətirib: "Bizim millət belədir, şaiyə danışmağı sevirik. Bu haqda eşidəndə, çox pis oldum. Belə söhbətlər heç də yaxşı deyil. Əvvəla, mənim gül kimi ailəm var, ikincisi də Zamiqlə dostluğumuzdan, əməkdaşlığımızdan istifadə edəb bizə qara yaxmağa çalışırlar. İnanmıram ki, Nigar belə düşünsün, çünki olmayan şeyə görə ailə dağıtmaz axı. Mən deyərdim ki, bu haqda heç yazmaq lazım deyil. Vallah ayıbdır!"