Zamiqin sürücülük vəsiqəsini alıblar

Müğənnini cərimə ediblər

Bir neçə gün əvvəl şəhərin mərkəzi küçələrindən birində Yol Patrul Xidmətinin əməkdaşları müğənni Zamiq Hüseynovun idarə etdiyi avtomobili saxlayıblar. Zamiqin SİA-ya verdiyi məlumata görə, buna səbəb müğənninin yol hərəkət qaydalarını pozması olub. Sağdan gələn avtomobilin yoluna çıxıb və polislər müğənninin sürücülük vəsiqəsini alıb, prtokol yazıblar: “Qaydanı pozmuşdum, polislər isə bunu mənə keçmədilər. Pozduğum qaydaya görə, sürücülük vəsiqəmi yazıb, göndərdilər müvafiq idarəyə. Mən də Azərbaycan vətəndaşıyam. Əgər mən qaydanı pozuramsa, bu o demək deyil ki, mənə nəyisə keçməlidirlər. Dövlət və qanun nəyi tələb edirsə, onu da etməliyik. Gedib cəriməmi ödəyib, sürücülük vəsiqəmi götürəcəyəm. İndi isə hələ ki talonla gəzəcəyəm. Bundan əvvəl də o qədər yazmışdılar. Ancaq bal yox idi. İndi isə 3 bal gələcək. Eybi yox, 1 ildən sonra silinər. Ancaq mən qeyd etməliyəm ki, artıq 10 ildir maşın sürürəm və qaydaların hamısını bilirəm”.

“Məşhurluğunuz sizə yolda kömək olur?” sualı ilə Zamiqə müraciət edəndə, o, belə cavab verdi: “Bir çox polislər məni saxlayanda, sənətçi olduğuma görə hörmət edirlər, bəziləri də var ki, əksinə. Əslində qaydanı pozanda onların tamamilə haqları var ki, cərimə eləsinlər. Hərdən olur ki, cüzi bir məsələyə görə saxlayırlar. Bir çox hallarda deyirlər ki, qoşa xətti keçmisən. Olur da, neyləyək, xətti də tapdalamışıq. Biz bilirik axı, Bakıda hər kəs yaxşı maşın sürə bilmir. Çox təəssüf ki, bəzi insanlar istisna olmaqla, bir çoxları çox pis avtomobil idarə edir”.

Zamiq həmçinin iştirak etdiyi polis toylarından da söz açıb: “Çox olub ki, “qayişniklərin” toyunda təmənnasız iştirak etmişəm və ürəkdən də oxuyub-gülmüşəm. Amma bu o demək deyil ki, mən tanımadığım bütün polislərin xeyir işində pulsuz oxumuşam. Sadəcə tanıdığım insanlar olub”.

Müğənnin sözlərinə görə, Dövlət Yol Polisləri sənətçilərə hörmət etməlidir: “Demirəm ki, göydən zənbillə düşmüşəm. Ancaq bir çox hallarda heç nəyin üstündə belə cərimə edirlər. Amma mən düşünürəm ki, hər bir sənətçiyəm hörmət olunmalıdır. Çünki ən azından biz də bu xalqa xidmət edirik. Və hər hansı bir dövlət tədbirinə gecikə qayda pozuruk ”.